|
ډاكتر سراجي طالب جانه غوږشه دا درې لسيزې كيږي چې زموږ په گران هېواد افغانستان كې د وروروژنې جگړه روانه ده . د جگړې هر لورى ځان وطنپال ، اسلامپال او ولسپال بولي . خو د هغو دكړووړو عيني پايلې ؛ د وطن ورانول،د اسلام بدنامول او د خلكو وژل دي . په دې اور كې زموږ د وطن او خلكو مادي او معنوي شتمنۍ وسوځېدې او لا سوځي . د دې ناخوالو دروند بار د هيواد د مېشتو ټولو قومونو او په تېره بيا د پښتون قام پر اوږو پروت و او لا دى . دغه قوم د نورو ورونو قومونو په پرتله هم د سرې جگړې په اور كې وسوځېد او هم په فرهنگي ډگر كې تر پښو لاندې شو .
د غميزې په پيل كې لومړنۍ وژنې د انقلاب ضد عناصرو تر
نامه لاندې په ختيزو ، سهيلي او سهيل لوديزو سيمو كې پيل
شوې او د سرو لښكرو له يرغل وروسته د خو طالب جانه! ستا په راتگ د ((كفن كش او بچۀ كفن كش )) كيسه رښتيا شوه . تا داسې كارونه وكړل چې د پښتنو نوم ، فرهنگ ، شان او شوكت دې له خاورو سره برابر كړ او لوړه شمله دې ورته په ځمكه راوويشته. لومړى تا خپله وژنه ، سوځونه ، ښوونځى بندونه او ورانونه له پښتون كور نه پيل كړه ، بيا دې د افغان په كور كې د ورونو مېشتو قومونو تر مينځ د نفاق اور بل كړ . په ټولوژنې ، كور سوځونې ، په زور لېږدونې دې لاس پورې كړ . د نجونو ښوونځي دې وتړل ، ښځينه كاركوونكې دې په كور كښېنولې . د افغانستان تاريخي اثار چې د دې خاورې د تېر نسل دپرتمين تاريخ او وياړ نښه وه ، په تو پو وويشتل . په شلمه پېړۍ كې د ې د وحشت او غضب توره دوره راوسته . زموږ د ملي عنعنو پر خلاف دې پر ښځو لاس پورته كړ . د خلكو لا څه چې حتى د ماشومانو له خولې دې خندا او خوښي واخيسته ، وطن دې په لوى زندان بدل كړ او په دې توگه دې د پوهې فرهنگ،او پښتنولۍ ضد خپله توره څېره وښودله . كابل ته په راننوتلو سره دې د خپلو پاكستاني بادارانو په دستور دهېواد پخوانى جمهور رئيس خو ستا د راتگ پر مهال د ملگرو ملتو په دفتر كې بې دفاع پناهنده ډاكتر نجيب الله د افغاني ملي او پښتني عنعنو پر خلاف وواژه او مړى دې په ډېر سپكاوي د خلكو نندارې ته وځړاوه . طالب جانه ! ته گرم نه يې ، ځكه چې نه له تا سره د وطن د ((مور)) مينه شته او نه له تاسره د قام زړه سوى . ته نه د خپل وطن له تاريخ خبر يې او نه د پښتنولۍ له ماهيت څخه . ته د بل په لاس جوړه شوې ((مصنوعي نانځكه )) يې چې هغه هر څه درته وايي ، ته يې تر سره كوې . اوس دې هم د ټوپك خوله پښتون ته نيولې او هره ورځ د پښتون بچى د وينو په څښلو خپله تنده ماتوي . تا د پښـتون قام فزيكي او معنوي نابودۍ ته ملا تړلې ده .ښوونځي سوځوې ، ښوونكي ، علما ، او دقوم مشران وژنې او بيا د جهاد نوم ورباندې ږدې. ستا د كړو وړو او جهاد تر منځ ډېر لوى واټن دى.په جهاد كې د خپل ځان ، كور ،كلي ، قوم او ولس د پت ،عزت او ناموس ساتنه ده. خو ستا په كړووړو كې څه ليدل كيږي؟ طالب جانه ! ولې دومره تميز نه لرې چې د شوروي له منگول څخه په وينو ژغورل شوى هيواد ، خلك، پت، عزت او وياړونه دې د بن لادن په سر كې سودا كړل او زموږ په پتمنه خاوره كې دې بيا د بهرنيانو شتون او د وروروژنې ادامې ته زمينه برابره كړه . طالب جانه ! داسې ښكاري چې تا په رښتيا سره د پاكستاني پوځيانو په تېره بيا د آى.اس.آى په دستور په افغانستان كې د بهرنيو پوځيانو پر ضد ((جهاد)) په پلمې د افغان كور ورانولو ته ملا تړلې ده . بهرني پوځيان هم ستا په پلمه پښتني سيمې بمباردوي او هرځل په لسگونو كورنۍ د غم او وير په ټغر كښېنوې. نن سبا د هيواد په نورو سيمو كې ښوونځي جوړيږي ، د لوړو زده كړو موسسې پرانيستل كيږي او هر ماشوم د ليك او لوست نه برخمن كيږي ، دا ځكه (شكر دى)چې هلته ستا وطن دښمنه څېره نشته . خو د پښتون په سيمه څه تيريږي؟د زده كړې او پوهې نه محروم پښتون په افغاني ټولنه كې څه رول لوبولاى شي ؟ په سياسي ، اقتصادي او ټولنيزو چارو كې څه دنده ترسره كولاى شي ؟ سبا موږ په سوله ايز افغانستان كې د خپلو نورو مېشتو ورونو قومونو سره د وطن د بيا رغونې ، پرمختگ او په سياسي واكمنۍ كې د برخې اخيستو سيالۍ ته روان يو ، آيا له زده كړې او پوهې پرته ، دغه سيالي گټلاى شو؟ نه ! نه ! بيا هم نه ! طالب جانه ! د افغانستان دټولو ورانكارو ډلو ريښې د پاكستان آى.اس.آى ته رسيږي . پاكستان تل كوښښ كوي چې په افغانستان كې ناپوه ، بې كفايته ، وروسته پاتې مذهبي ډلې واكمنې وي ، داسې ډلې چې د ننني عصري علومو او ټكنالوژۍ مخالفې وي ، ښوونځي د الحاد ځاى وگڼي ، ښوونكي شهيدان كړي او لنډه دا چې د افغانستان د سياسي استقلال او نړيوال هويت بنسټ وران كړي او دغه وطن د منځنيو پېړيو دورو ته ، شاته وغورځوي . آيا ستا كړه وړه همدا نه دي؟ پروېز مشرف په خپلو ويناوو كې وايي : قبايل (پښتانه) قاتلان او ترهگر دي . خو ته دا په عمل كې نړيوالو ته ښيې چې ته څوك يې او دكوم فرهنگ خاوند يې ؟ له كړو وړو دې مالوميږي چې ته پښتون نه يې .خو څه وكړو چې د پښتنو دښمنانو ستا نوم د پښتون سره يو بولي او په دې توگه ستا ټول غير انساني ، غير اسلامي او غير افغاني كارونه په پښتون قوم پورې تپي. طالب جانه ! كه ته پښتون يې او د پښتنې مور شېدې دې رودلې وي نو راشه د پښتون قام د نابودۍ او بدنامۍ نه لاس واخله او په پښتني عزم سره د دې ځورېدلي ولس د سولې ،آرامۍ ، سوكالۍ ،خوښۍ او نېكمرغۍ لپاره ملا وتړه ! پښتني جرگې ته كښېنه ! د ټوپك په ځاى د پوهې او قلم په ډگر كې مبارزه وكړه ! خداى (ج) مكړه هغه وخت رانه شي چې پښتون قام په خپله خاوره كې پردى وي او د لږكي كوچني وړوكي قام په توگه وپېژندل شي . لنډه دا: چې گوناهو ته دې نظر كړم ــ طالبه ځاى دې په وطن كې نه وينمه وړانديز : له ټولو روښان اندو وطنوالو ، ديني علماؤ ، قومي او ملي مشرانو ، سياسي او ټولنيزو سازمانونو څخه هيله كوو چې د طالب ناورين مخه ونيسي ، مخالف لورى د خبرواترو د مېز تر شا كښېنوي . دباور او اعتماد فضا رامنځته كړي ، د ملي روغې جوړې په رڼا كې د آرام سوله ايز ، يو موټي ، پرمختللي نوي افغانستان پاڼه پرانيزي او د دې خاورې د هر بچي پت ، عزت او حيثيت وساتل شي . ومن الله توفيق |