پوهنمل حاجي محمدنوزادي
           ډنمارک              

 متحده جبهه که تر مورمهربانه ميره ؟

زه ديوه علمي اصل په توګه لدي نه انکار نشم کولاي چي دانسان غوښتني اوکړه وړه دوخت په تيريدوسره تغيرات هظمولاي اوبدلونونه  موندلاي شي ځکه چي ټوله ژوي دژوندني چاپيريال سره د ادپت ) توافق کولو ( وړتيا لري   .  ددغه پوهنيز اصل له مخي يادشوي بدلونونه دوه اړخه لري چي يو ئي مطلق اوبل ئي نسبي دي .

            ۱    ـ   مطلق بدلون  .

داډول بدلونونه دفزيکي چاپيريال تر اغيزو لاندي په ژوندي ارګانيزم کښي دوخت ديوه اوږده واټن په تيريدو سره منځته راځي چي کيدلاي شي دوخت واټن ئي په لس ګونو زره کاله اويا لدي نه هم زيات وي . مطلق بدلونونه په تدريجي توګه ترسره کيږي ، ديوه اوحتي څو نسلونو دپاره دليدلو او پوهيدلو وړ نه وي ، مګر يو حتمي او واجب الاجرا عمل دي چي دانسان ذهنيت ورباندي مثبت يا منفي تاثيرنلري .

        ۲  ـ  نسبي بدلون     .

داهغه بدلونونه دي چي دټولنيز چاپيريال تر اغيزو لاندي دټولنې دغړو په کړو وړو کښي منځته  راتلاي شي .  ددي کار دپاره د پيړيوتيريدوته اړتيا نشته خو دانسان ذهنيت دلته اړين رول لوبوي  . دابدلون حتمي ندي ځکه چي دټولني دهر غړي اويا ټاکلو ډلو دغوښتنو ځانګړتياوي پدي هکله بي اغيزي ندي  .

         ددغه دوهم اصل په پام کي نيولو سره به راشو دنوي جوړي شوي جبهي دغړو کړو وړو ته   . ددي متل څخه به هم تيرشو چي وايي  ) ازموده را نه ازمائيد ( ، ځکه چي دټولنيزو مسايلو سره دګماتيک نظر کيدلاي شي انسان پرغلطه لاره برابر کړي . پدي خاطر به پرځاي کار داوي چي دنسبي بدلونونو په منلو سره دجبهي دغړو رښتنې کړو وړو ته نظر واچوو ، ددغو بدلونونو کچه و ارزوو اوبيا ئي په اړه څرګندوني وکړو  .

            ځما په اند به دا دمنطقو او پوهي څخه وتلي خبره اولويه بي انصافي وي چي په يوي سياسي ډلي کښي ټول غړي په يوه ترازو کښي وتلل شي   .  په جبهي کښي هم لکه دبل هرګونداويا

 سياسي ډلي پشان کيدلاي شي هم پاک اوهم ککړ خلګ پيداشي  .  له همدي کبله بايد قضاوت او ارزونه يومخيزه نه وي چي يا ټوله ډله ښه وګڼو اويائي بده وبولو  . پکارده دقضاوت په موخه دوه لاندي معيارونه په پام کي ونيسو   :

            ۱  ـ  دسياسي ډلي دمخکښانو او فعالينو داکثريت کړه وړه   .

            ۲  ـ  دنوموړي ډلي دعملي کړنلاري )  نه دکاغذ پرمخ دليکل شوي مرامنامي  (  ارزونه      .

            اوس نوکه  دغه نوي جوړه شوي جبهه دلوړو معيارونو په غيږ کي راونغاړو ، نو په څرګنده وينو چي دمشرتابه ډلې او مخکښانو اکثريت ئي هغه کسان دي چي يوازي دکابل اوسيدونکود  ۶۰ زرو نه زياتو بيګناه خلګو په وينو کښي ئي دتعميد غوسلونه کړي  او دورانو کوڅو لوټې ئي اوس غاړو ته دګلانو اميلونه چوي   ،  او .. . . . . . . . .

            که چيري داټولې ناخوالې يوازي ددوي په ماضي پوري وتړو او داسي فرض کړو چي دوي هم اوس پرخپل ماضي پښيمانه دي ، نورغواړي خپله ورانکاري جبران  اوپه جبهه کښي اولس ته دملهمو دتوليد يوه ستره فابريکه پرانيزي ترڅودابي شميره زخمونه پري غوړ کړې   .  دبده مرغه  ددوي عملې ګامونه ښئي چي دخلګو داډول اميدونه  دنااميدې په سيند کي لاهودي  ،  ځکه چي دوي نه يوازي پردغو کارونو پښيمانه ندي بلکه جهادفي سبيل الله او مقاومت برحق ورته وايي  ،  داکاروطن ته سترخدمت او له کبله ئي دوطن خلګ خپل منتبار ګڼي .  له همدي خاطره په خپل جوړ کړي په اصطلاح دملي مصالحي دمنشور په  )   ۱  ( ماده کښي دخپلو دغو) ستروخدمونو ؟  ( په بدل کي پر دي دنيا اجرعظيم

 غوا ړي ترڅو په دولت کي دپام وړ مقامونه ورته وسپارل شي  .

                   دوي په خوله نارې  وهي چي جبهه ئي ددولت سره  دهمکارې اومرستې کولو پخاطر جوړه کړي  ، ددي لارې ئي ليڅي رانغښتې دي ترڅو په هيواد کښي امنيت ټينګ ، دفسادريښې له بيخه وباسي  ، داسي عدالت پکار واچوي چي دحضرت عمر فاروق ) رض ( روح و رته ګوته په غاښ ونيسي او پدي توګه ارامه ، سوکاله ، پرمختللې  او دخوښيو ډکه نيکمرغه ټولنه افغان کړيدلې اولس ته سوغات وړاندي کړي .   نو  ايا سکنۍ مور چا  دومره مهربانې  ليدلې ده    ؟

               خو له بله پلوه راشې وګورو چي په دوي کښي ددومره مهربانې پوتنشيال شته او څنګه   .   دامنيت ټنګښت خو ددوي د وسلو وتسليموو ته اړتيالري  ،  دفساد له منځه وړل خو ددوي دپنځم ستون   ړنګول غواړي    ؛  ټولنيز عدالت  ددوي دهغو زيرمه کړو شتمنيو استرداد ايجابوي  ، کومي چي ئي دبيت المال نه چور کړيدي  . که دا ټوله کارونه  ترسره نشي بيانو داوسنيو ټولو بدمرغيو علت العلل پر خپل ځاي پاته او جبهه به يوازي داوسني دولت دپاره دامتيازترلاسه کولو په موخه د سر درد جوړ کړي او اولس ته به  يوه بلاربه بلا شي چي هره شپه به په سل ګونو غمونه زيږوي  . داځکه ددي پرځاي چي دولتي اړوند ارګانونه دامنيت او بيا رغاونې چاروته پام واړوي  ، بايد ددوي سره په مقابله کي بوخت اوشکيل پاته شي . پدي توګه به جبهه لکه څنګه فکرکيږي ،  هغه ميره  وي  کومه چي ځان تر مور مهربانه ښئي .   دوهم داچي که دوي په رښتياهم ځانته دامتيازونو ترلاسه کول هدف ونلري او د زړه له کومي ددغه اوسنې ناخوالو څخه داولس ژغورل غواړي ، بيانوددوي دپاره دخدمت کولو  لاره همدااوس دهمدغه اساسي قانون اوهمدغه رياستي  سيسټم په چوکاټ کي چابنده کړي  او ددي کار دپاره د اساسي قانون  په مقابل کي کودتا ،د صدارتي سيسټم منځ ته راوستل ،  دولايتي مقامونو انتخابي کول اوداسي  نوروهستيريکو هلوځلو ته چي کلونه وخت اومبارزي ته اړتيا لري ، څه ضرورت دي   ؟ 

له همدغه ځايه ددوي صداقت  ترلمر څرګند اوخلګ به ورته ووايي چي له خيره مو بيزاره يو خو شر مه راپيښوې   .

                 داخبره هم ديادوني وړده چي دوي ديوي خوا ځان ددولت همکار اومرستندويه قوه بولي ، خو دبل لورې ئي دهغه اساسي قانون ورانول خپله رسمي او بنسټيزه موخه ټاکلې ده   ، دکوم وحراست او درناوې ته چي نوموړې دولت داولس په مخ کي په لوي خداي ) ج ( او دهغه په پاک کلام  سره قسم وړلې دې .

                       لکه څنګه چي مي  د ) متحده جبهه ، ننګوني او ارزوني  ( تر سرليک لاندي په خپلي تيري ليکني کښي  دجبهي څرګندو ) تاکتيکي ( او پټو  ) ستراتيژيکي ( موخوته ګوته نيولې وه  ، يوار  بيا دلوستونکو پام  و دي خبري ته را اړوم چي دا لاره ترکستان ته ځي او دولايتي مقامونو انتخابي کيدو ته لمن وهل دفدراليزم هغه خوبونه دي چي سناريو ئي  ۳۰ کاله  پخوا دهيواد دتجزيي پخاطر په کرملين کي جوړه  او په شپيتمو کلونو کښي دمسکو دتالي څټي سلطانعلي کشتمد په مشري ئي دبنسټ خښتي ايښودلو ته اړين کارونه هم ترسره شوه   .

                  داريانا تلويزيون سره په اړونده مرکه کښي  د ښاغلې سيدمحمد ګلاب ځوي دڅرګندونو په هکله   آغلې شکريي  بارکزۍ په زړه پوري خبري وکړي اودجبهي پر ډيرو اړخونو ئي رڼا واچوله   . دګلاب ځوي صاحب دڅرګندونويوازني بنسټ دا وو چي ګويا دادي پدغو کاغذونو کښي  خو هيڅ  داسي کوم بد شې نشته   .  لويه بدمرغي ځما په اند همدلته ده چي ده غوندي کسان يا ځان تيرباسي اوياهم يوازي دکرد سر ليدلاي شي او دي خبري ته ئي لا تر اوسه پام نشته چي داکاغذونه هغه کاسه ده کومه چي ورلاندي نيم کاسه لري او د ګازرو هغه بار دي چي ترپان ئي په پاي ک پراته دي  .

                 هيله ده دقلندر رحمان بابا دابيت ددغه ډول کسانو فکر دموضوع اصلي موخي ته راواړوي   :

 هر  چي کر کا د اوربشو  غنم    غواړي
له خاطره دي بيرون کا دغه خيال څوک . 

 وطن ته په نيکو پيرزويونو     !