په افغانستان کې د عدالت غوښتنې ډیوه په مړه کېدو ده

په ډنمارک کې د افغانستان د فرهنګي خدمتونه مرکز ( خپلواکۍ ) اعتراض لیک

د عدالت خوښونکي لوی خدای په نامه

په داسې شرایطو کې چې په افغانستان کې د عدالت ، دموکراسۍ ، بشري حقوقو ،حقدار ته د حق د رسولو په موخه  دطالبانو پر دولت  له ځمکې او هوا نه  د ټولې نړۍ د زبر ځواکونو حملې او یرغلونه پیل شول او موږ افغانانو یې هرکلی وکړ ،په داسې شرایطو کې چې  د جرمني د بن  د تاریخي کنفرانس نوښتګرو او سره راټول شویو یارانو افغانستان او افغانانو ته د یو له انصاف نه ډک واک او ځواک جوړونه ترسره کړه او دښاغلي  حامد کرزي تر مشرۍ لاندې یې  یو نوی دولت افغانانو ته صادر کړ  او دغه دولت خلکو ته د عدالت او هوسا ژوند زیري ورکړل ،  په داسې شرایطو کې چې  د افغانستان لنډ مهالی ، منځمحالی او د خلکو لخوا انتخاب شويو دولتونو یو په بل پسې د حق ، عدالت  او انصاف شعارونه ورکول او د هر دردیدلی افغان له هرکلي سره مخامخېدل ، په داسې شرایطو کې چې نړېوالو او په ځانګړې توګه د ملګرو ملتو ادارې  او ټولې لویدیځې نړۍ په افغانستان کې د عدالت د پلي کولو  په پلمه  د وسلو او پیسو کاروانونه  د افغانستان پر لور راوخوځول او افغان مظلوم ولس یې  د مننې نارې او سورې دلته او هلته پیل کړې ، په داسې حال کې چې د افغان ملت  بچیانو د عدالت د ټیګتیا او د خپلو شهیدانو  له قاتلینو او د کابل ښار او نورو ښارونو د لوټونکو او تباه کوونکو څخه د حساب او کتاب  د غوښتنې په تمه  د ښاغلي حامد کرزي مشری ته رایه ورکړه او د هغه  په ظاهر کې دموکراتیک اساسي قانون ته یې لاسونه پورته کړل ، په داسې حال کې چې  د کابل ښار د لوټمارانو له ظلم او وحشیانه تېریو څخه د متضرره کورنیو بچیان د خپل ښار ، خپل کور او خپل مالت د ورانېدو  پوښتنې لري او همدا نارې وهی چې ای خدای ناترسه وحشي جنایتکارانو ! ولې مو کابل لوټه لوټه کړ؟ ولې مو زموږ میندې او پلرونه  شهیدان کړل ؟ ولې مو زموږ ناموسونه بې پته کړل ؟ ولې مو د خلکو شخصي او د هېواد ملي شتمني چور او تالان کړه ؟ ولې مو هېواد ته د مرستې  ډالري چکونه په خپلو جیبونو کې واچول او دا دی  اوس مو پرې  ماڼۍ ګانې او قصرونه آباد کړي ؟  او دې ته ورته نورې پوښتنې  هره ورځ په خپلو ذهنونو کې  بې ځوابه ګرځوي، په داسې شرایطو کې چې د عدالت په نوم  د پخوانۍ یوګوسلاویا مشر سلوبودان مېلاسویچ د هاک محکمې ته راکشول کیږي ، په داسې شرایطو کې چې  د لکونو انسانانو وژونکی پنوشه د عدالت محکمې ته راغوښتل کیږي ، په داسې شرایطو کې چې صدام حسین د هغه د عسکرو لخوا  د یو څو تنو د وژلو په تور  اعدامیږي ، له بده مرغه په افغانستان کې  جنګي جنایتکاران ، قطاع الطریقان ، غله ، سړي وژونکي  او لوټماران  د افغانستان د ولسمشر لخوا د معافیت سند ترلاسه کوي ؟!!!دا په داسې حال کې ده چې  ددغو جانیانو له لاسه متضرره کورنۍ چیغې وهي چې  ګرانه ولسمشره ! زموږ حق راکړه ، موږ خو تا ته رایه درکړه چې  د مظلوم پوښتنه وکړي ، خو تا زموږ په رایه ظالم  په شا وټپاوه او  د ټولو  جنایتونو څخه یې ورتېر شوي ،د څه لپاره ؟ په کوم حق ؟ دې سړي خورونکو خو  په کانتینرونو کې  زموږ پلرونه  او ورونه  د هوا د نشتوالي له امله مړه کړل ، د شلمې پېړۍ او یوویشتمۍ پېړۍ دغو آدم خورو خو د خلکو پر سرونو میخونه وټکول  ، دغو بدمعاشانو خو په خپل هر راکټ باندې  په هر کور کې ماتم جوړ کړ ، دې پاټکیانو خو د ناجایزه مال او شتمنۍ د تر لاسه کولو لپاره هر غیر اسلامي او غیر انساني عمل ترسره کړ او د هر پردي نوکري یې وکړه ،دوي خو په لکونه خلک مهاجرت  ته اړ وېستل ،  دوي زموږ حق خوړلی او تاسو دا ټول وروبښل ؟!!!ملت دا نه مني ، ملت اعتراض کوي  . هوکې  ! نن د افغان ملت په هر کور کې همدا د اعتراض غږ پورته دی او د

 ( خپلواکۍ ) فرهنګي مرکز هم  له خپلو خلکو او نړېوالو سره خپل دغه شان اعتراض غبرګوي  او په افغانستان کې د وروستیو دېرشو کلونو د هر راز جاني او سړي وژونکي  معافیت  د منلو وړ  نه بولي  . له دې سربېره  موږ فرهنګیان په دې  عقیده یو چې  دغو جنایتکارانو چې یو شمېر یې  همدا اوس هم په واک او ځواک کې دي  له هماغه پیل نه بیا تر ننه د افغانستان  د لرغوني  مدنیت او تاریخ ډېرو مهمو ارزښتونو ته د یادونې وړ زیان رسولی .تاریخي آثار یې غلا کړي ، د هېواد د قیمتي ډبرو د ناقانونه خرڅلاو تر څنګ یې  د افغانستان ملی موزیم لوټ کړ ، ملي آرشیف یې په پردیو خرڅ کړ ، د آی خانم ، طلا تپې ، مندیګک ، سیاه سنک ، قره کمر ، بامیانو ، هډې   او داسې نورو بې شمېره تاریخي ځایونو آثار یې تر امریکا او اروپا خرڅ کړل ، او څه یې خپلو  روسي ، ایراني ، پاکستاني ، عربي   او نورو بادارانو ته په سوغات ورکړل  چې دا ټول د سترو جنایتونو په کتار کې راځي او هېڅوک حق نه لري دغه شمېر غله او جانیان معاف کړي .دوي د افغانستان ملي ارزښتونه تر پښو لاندې کړل ، ملي فرهنګ او ملي تاریخ ته یې سپکاوی وکړ او په فرهنګ وژنه کې ځانته د اتلوالی لقبونه ورکړل  .

موږ په داسې حال کې چې  د جنګي مجرمینو د بښلو دغه طرحه او د هغه توشیح په کلکه غندو ، لوی خدای نه دا غوښتنه لرو چې  حق خپل حقدار ته ورکړي

آمین یارب العامین

یوسف هېواددوست