|
ډاکتر شېرحسن حسن مسکو د روسيې په مسکو او سانکت پتر بورګ ، د اکرائين په ادېسه او د بلاروسيې د مينسک په ښارونو کې د مېشتو افغانانو له خوا د شهيد وطنوال د فاتحې او دعا مراسم ترسره شول د هېواد د هڅاند سياسي ټولنيز شخصيت ، په ولسي جرګه کې د ارزګان د خلکو استازي او د افغانستان د ملي ګوند د مشرتابه هيئت غړي شهيد محمد هاشم وطنوال روح ته د دعا او فاتحې مراسم د مسکو ، سانکت پتر بورګ ، ادېسه او مينسک ښار د مېشتو افغانانو له خوا دروان کال د جولای په ۲۲ نېټه د خپلو اړوندو ښارونو په جامع جوماتونو کې ترسره شول . په دغو مراسمو کې سلګونو افغانانو برخه اخيستې وه . شهيد وطنوال په هېواد کې د سولې، دموکراسۍ، ټولنيز عدالت او افغاني ملي ارزښتونو د ساتنې او پالنې دلارې نه ستړي کېدونکی او مخلص مبارز ؤ. شهيد وطنوال د هېواد د هر اړخيزې ښېرازۍ لپاره د ټولو منورينو د سرتاسري تفاهم او پراخ روښانفکري نهضت د رامنځته کېدو په لار کې په ټوله زړه ورتيا، صداقت او رښتينولۍ جد و جهد کاوه . شهيد وطنوال يوازې له خپل هېواد او هېواد والو سره د ژورې مينې له کبله په ټولو مادي نعمتونو سمبال اروپايي ژوند پرې ايښی و او د ژوند برخليک يې هره لحظه د خپلو هر دم شهيدو هېوادوالو سره شريک کړی ؤ . شهيد وطنوال هره لحظه د ټولو ځورېدلو او ربړېدلو وطنوالو په غم غمجن او په درد دردمن ؤ. د شهيد وطنوال پراخه سينه د افغان او افغانيت سره د ژورې مينې کور ؤ، په دغه کور کې د محرومو افغانانو غمخوري او مينه پالل کېده او دغه سينه دومره مينه ناکه او خوښي بښونکې وه، چې په هر ډول ستونزمنو حالاتو کې يې شاوخوا ماحول د ځان سره خوښ، فعال او روان ساته . د شهيد وطنوال ميړنی وجود او پراخه سينه تل د هېوادنۍ مينې، ملګرتوب ، شجاعت او مردانګۍ الهامځای ؤ. د شهيد وطنوال ټټر ، دغه د افغان او افغانيت د مينې کور د افغان او افغانيت د دښمنانو په ناولو لاسونو سوری شو، او وينو يې دسر لوړي ، خپلواک ، ودان او ښېرازه افغانستان د لارې ټولو يارانو او همفکرانو ته د پراخ يو والي پيغام پرېښود. دشهيد وطنوال په غم کې شريک يو، هغه ارواښاد ته جنتونه غواړو ، کورنۍ ، ټولو ملګرو او د اروا ښاد د شخصيت مينه والو ته د جميل صبر غوښنته کوو. روح دې يې ښاد او ياد دې يې تلپاتې وي !
|
