په ناروې کې د نامتو شاعر او سياستوال
ارواښاد اجمل  خټک  فاتحه واخيستل شوه

 د ستر سياسی او فرهنګی شخصيت اجمل  خټک سترې اروا ته د دعا مراسم او فاتحه  د ناروی هيواد په پلازمېنه ، اوسلو کې د افغانانوپه جامع جومات کې پر ځای شول .

د پرتمينې فاتحې په مراسمو کې بر سېره پر ګڼ شمېر هيوادوالو د اجمل خټک نږدې دوست او ملګری ، سياستوال او زمونږ د هيواد خوږ ژبې شاعر محترم  هنر غيرت ( شينواری )، د کوزې پښتونخوا وتلی ټولنيز او سياسی شخصيت ، د عوامی نيشنل پارټۍ غړی محترم نوردادخان ( يوسفزی ) ، همدارنګه ځينو جهادی څيرو لکه محترم علم ګل  ( مصلح )  او محترم محمداله ( ناقب ) ګډون کړی وو .

د فاتحې مراسم د محترم علم ګل ( مصلح ) له خوا د قرآن کريم په تلاوت سره پيل شول .

وروسته محترم هنر غيرت ( شينواری ) د پياوړی سياسی او ادبی  شخصيت او نه ستړی کيدونکی انقلابی مبارز اجمل خټک د وياړه ډک ژوند په هکله د ستر او ژمن شاعر په دې بيت خپله وينا واوروله :

که آوری ، آوری ، که نه آوری ،نه آوری

يوه ورځ به واوری، چې خټک ومړ 

وړاندې غيرت وويل :هسې لکه چې د وتلی خټک ژوند ګويان ، روښانه ، او ځلانده وو، د هغه مړينه هم د ژوند او مينې په څېر بربنډه او څرګنده ده .خټک د خپل ورنيکه خوشال خټک په څېر شاعر وو ، د سنګرونو شاعر ، د مورچلونو شاعر او د ننګونو شاعر ! معاصر او ځوان خټک د تورې ، ننګ او قلم د خټک په څېر ويل چې :

موږ ليونی که څوک په دار ويروی     موږ ته د يار د زلفو تار ښکاری

موږ يې د ژوند د پسرلی نښه بولو      چا ته به ګل چا ته به خار ښکاری 

ستر خټک نه يواځې د خپل افغان ولس او تاريخی افغانستان دوست وو ، بلکې هغه د انسان او انسانيت او ټولې نړی دوست وو .  هغه د خپل قوم او خپل تاريخی هيواد او هيوادوالو له پاره د ننګ او غيرت چغه پورته کړه ، د هغه ټول وياړلی ژوند يوه له شوره ډکه حماسه وه . د ولسونو د راويښولو حماسه ، د عادلانه مبارزې ډګر ته د وردانګلو حماسه ،د افغان او افغانيت ، انسان او انسانيت  په ننګه د توغونو د اوچتولو حماسه !زما د پياوړی ملګری اجمل خټک افسانوی ژوند د جيلونو ، تبعيدونو او په کور د ننه د زغرو او ډغرو ، غورزيدو او پرزيدو رنګينه افسانه وه .پوره پنځه کاله وړاندې د افغانستان د علومو د اکاډمۍ پوهانو ، د هيواد تاريخی او سياسی شخصيتونو د سياست ، شعر او ادب د نړۍ اتل اجمل خټک ته د هغه دزيږيدو د اتيايمې کاليزې په وياړ ، د بابا لقب ورکړ د خلکو قضاوت د تاريخ قضاوت دی  اود  تاريخ  قضاوت د کاڼی کرښه ده .د خټک بابا او د هغه د ژوند په هکله خبرې د پراخو سيمينارونو او علمی څيړنو موضوع ده .د بابا ياد دې تلپاتې او اروا دې ښاده وی ! 

ور پسې محترم محمداله ناقب د ستر خټک د استعمار ضد مبارزو، او د هند په نيمه وچه کې ددې مبارزاتو د نقش ، د پښتنو او بلوڅو د حقه حقوقو د اعادې په لاره کې د اجمل خټک د جدوجهد په اړه  پراخې خبرې اترې وکړې او زياته يې کړه چې خټک د افغان غميزې په درشل کې د افغانانو د پاره د يوه مواظب ، مهرابانه او غمخوره پلار او بې ساری لارښود  حيثيت درلود .د فاتحې مراسم د دعايې په لوستلو سره پای ته ورسيدل .