talafghan.com

په مسكو كې د افغانانو لخوا
د ارواښاد خټك د فاتحې او ياد غونډې مراسم ترسره شول

كولاى شئ د انځور په كليك سره هغه په لويه كچه وگورئ!

د لوى شاعر، ليكوال ، سياستوال او په سيمه كې د عدم تشدد، عدالت او خپلواكۍ د لارې د نه ستړي كېدونكي زړه ور مبارز او خدايي خدمتگار ارواښاد اجمل خټك روح ته د دعا او فاتحې مراسم او د ده شخصيت ته د درناوي ياد غونډه نن جمعه دفبرورۍ ۱۹ نېټه په روسيه كې د مېشتو افغانانو او دارواښاد اجمل خټك د شخصيت د مينه والو له خوا د مسكو ښار د سېواستوپل هوټل په جامع جومات كې تر سره شول . د فاتحې او ياد غونډې دغو مراسموته د مسكو ښار او شاوخوا سيمو څخه گڼ شمېر افغانان راغلي وو. دغه مراسم، چې له پيل څخه تر پايه پورې د قران كريم د مباركو آياتو نو په لوستلو منور او سپېڅلي و، په يوه برخه كې يې دلته اوسېدونكي افغان هېوادپال او فرهنگ پال ډاكتر شېرحسن حسن د ارواښاد اجمل خټك د درانه او څو اړخيز شخصيت په باب څو لنډې خبرې وكړې ويې ويل :

((رواج خو دادى ، چې له د نيا څخه د تللو خداى بخښلو ته د دعا او فاتحې مراسم د هغوى د كورنۍ، خپلوانو او يا نږدې دوستانو له خوا اعلانيږي . زموږ د اوسېدو په ماحول كې هيڅوك هم د ارواښاد اجمل خټك د كورنۍ غړى او نږدې خپلوان نه شته ، خو ارواښاد خټك زموږ د ټولو ډير حقدار مشر دى، هغه موږ ټولو ته ډير ستر فرهنگي ميراث پرې ايښى دى، هغه د ډير ستر انساني فضيلت او بصيرت خاوند و، عزت النفس او انساني وقار د هغه د شخصيت ځانگړتياوې جوړولې . هغه له تنكي زلميتوبه په خدايي خدمتگارانو كې د فخر افغان (عبدالغفار خان) ډير نږدې او ثابت قدمه ملگرى پاتې شوى دى . هغه خپل ځان او د ژوند ټول سرنوشت د افغان له نامه سره تړلى و، او د خپل ستر نيكه ، خوشحال خان خټك ريښتينى لمسى او لار پالونكى و، چې لا پخوا يې ويلي وو:

د افغان په ننگ مې وتړله توره
ننگيالى د زمانې خوشحال خټك يم

پر موږ ده چې دده لار به پالو او زموږ وظيفه ده چې ددغه ستر حقدار مشر د سياسي تفكر ، فرهنگي او ټولنيز ميراث ټوله معنوي هستي د افغان ولس د پراخې پرگنې ځوان نسل ته ورسوو.

پر موږ ده چې د اجمل خټك په شان مشران وپالو او زموږ د ملي وحدت مشترك سمبولونه هېر نه كړو. د اجمل خټك روح دې ښاد او ياد دې يې تل پاتې وي . ))

د دعايې په پاى كې د مراسمو په گډونوالو » د غيرت چيغه « په نامه هغه ځانگړې گڼه اخبار وويشل شو، چې د اروا ښاد اجمل خټك د شخصيت په درناوي د تل افغان وېب پاڼې له خوا ترتيب او چاپ شوې وه .