د ګران او قدردانه ځوان عبدالناصر ريشاء د منني د پيغامه څخه   مننه کوم!

 د ښاغلي عبد الناصر ريشاء د مضمون متن چي ما ولوست نو په هغه کي  ماته  ددغه ځوان فکري توانمندي او پر خپله ژبه باندي د هغه عالمانه تسلط   د ورايه  ښکاره سو . ځوان ریشاء د دغه شاني  وړتيا په درلودلو سره وښودله چي د فضیلت په لور روان  ځوان دئ  چي  زه لا مخکي تر مخي ورته   د زیاتو بريو هیله کوم .

 بل داچي دغه با احساسه ځوان لکه په لکهاوه نور ځوانان چي د وطن او ژوند ناخوالو د نړۍ و هر کونج ته ټېل وهلي دي ناصر جان يې تر لندنه رسولی دئ، نوموړي په خپل دغه مغزن پیغام کي  دا خبره ثابته کړېده چي د مهاجرت په ناوړه حالت کي چي جسمي او روحي فشارونه ټول افغانان را احاطه کړي دي خو دهغه غوندي ځوانان د کورنيو او اولادو نفقه پيداکوي،  زحمتونه ګالي،   تحصیل کوي،  مطالعه لري او هم  دا چي د ورځني مسائلو و مغز ته ور  ننوزي او په خپله ژبه بيا قضاوت هم ورباندي کوي ،او په مشرانو او پوهانو ږغ هم کوي چي دغه ځوانان ستاسو و معلوماتي لیکنو ته اړتيا لري .

د ځوان ریشاء  دغه شاني تحرک او د مسؤليت احساس  د زيات قدر وړ دئ چي هغه ته د روښاني راتلونکي زيری ورکوي  .   په وطن کي چي داسي با احساسه او علم او معرفت ته لېواله ځوانان وي نو د ښې راتلونکي اميد به ولي د لاسه وزي . د سبا مسؤلیت خو د همدغه روښانفکره ځوانانو په لاس کي دئ .

 لا د پخوا څخه ويل سوي وه چي د هر ليکوال، څېړونکي محقق، شاعر، اديب  د کار او زحمت ثمره  خلک او لوستونکي تعينوي  او د هغوی په زړو کي ځای نيسي، هره ليکنه  چي په  شوق سره لوستل کيږي لکه ناصر جان ریشاء  چي  په ليکنو کي  د واقعیت و موندلو ته لېولاتيا ښودلې  او هغه يې بیا پسې تعقیب کړې هم  ده، نو زه فکر کوم ليکوال چي هر څوک وي د خپل زحمت پاداش  يې تر لاسه کړی او د خپل مخاطب قناعت  يې حاصل کړی دئ .

 زه يوځل بيا د ښاغلي عبدالناصر ريشاء څخه مننه کوم چي د لويو او درنو ليکوالانو تر څنګ يې  زما د يوې خاشې غوندي  خو صادقانه  هڅو يادونه   کړېده، هغه يې ستايلېده  او ماته يې وياړ را بخښلی دئ . زه جداً فکر کوم چي زما دغه  هڅي بې ځايه ندي ضايع سوي !

 زه هغوی ته  د روغتیا اود ژوند په هره عرصه  کي د زیاتو بریالیتوبونو غوښتنه کوم .

په درنښت
هدايت الله هدايت
اسټرليا